Ці павінны Хрысьціяне сёмы дзень сьвяціць?

Пытаньне

Скажы мне, ці павінны Хрысьціяне сёмы дзень сьвяціць? Ды яшчэ: дзеля чаго яны нядзелю сьвяцяць, а не суботу?

Адказ

Хто зразумее, дзеля чаго Бог загадаў Ізраэльскаму народу сьвяткаваць суботу, той лацьвей можа зразумець, у чым хрысьціяне ад сёмага дня вольныя, а ў чым яго павінны спаўняць. Бо знаходзім у Старым Запавеце чатыры прычыны, дзеля якіх Бог загадаў сьвяціць суботу. Першая прычына – каб узгадваць стварэньне сусьвету. Пра гэтую прычыну Майсей так піша: «Бо ў шасьці днях стварыў Госпад неба і зямлю, і мора ды ўсё, што на іх ёсьць, і супачыў у сёмы дзень» (Вых. 20), нібы так ён хацеў сказаць: «Памятай, каб дзень суботні сьвяткаваць ды не забыцца, што за шэсьць дзён Бог стварыў увесь сьвет».

Другая прычына – каб людзі мелі знак або вобраз адпачынку духоўнага, бо субота азначае, што ўсе мы патрабуем, каб Бог нас асьвяціў ды прыняў у вечны адпачынак. Пра гэтую прычыну Майсей паведаміў у кнізе Выхаду, калі напісаў: «І сказаў Госпад: “Глядзіце, каб вы захоўвалі суботу Маю, бо гэта знак паміж Мною і вамі для ўсіх пакаленьняў вашых, каб па гэтым можна было пазнаць, што Я – Госпад, Каторы асьвячае вас”» (Вых. 31). Пра гэтую ж прычыну Эзэкіль падрабязна распавядае ў дваццатай главе, дзе паміж іншым піша, як Госпад сказаў: «І даў ім суботы Мае, каб былі знакам паміж Мною і імі, каб ведалі, што Я – Госпад, Каторы іх асьвячае». Як Майсей, так і Эзэкіль гаворыць, што дзеля таго Бог даў нам суботу ды яе загадаў сьвяткаваць, каб мы зразумелі, што нам патрэбна Божае асьвячэньне.

Трэцяя прычына – каб людзі мелі асобны дзень, у які б вывучалі Закон ды іншыя сьвятыя справы рабілі. Лука ў Дзеях Апостальскіх узгадвае, што Закон Майсеяў чытаецца кожную суботу. Чацьвёртая прычына – каб нявольнікам ды нявольніцам, і жывёле быў адпачынак. Пра гэтую прычыну Майсей так напісаў: «Шэсьць дзён будзеш працаваць, а ў сёмым дні – субота Госпада. Не рабі ў ім ніякай працы, хай адпачне вол твой ды асёл твой, хай аддыхне сын нявольніцы тваёй і чужынец, які прабывае ў брамах тваіх».

Вось цяпер паглядзі на гэтыя прычыны і сам зразумееш, што мы павінны рабіць паводле гэтага слова, а што не павінны. Бо паводле адных прычынаў мы ўжо вольныя ад сёмага дня, а паводле іншых прычынаў патрэбна, каб і Хрысьціяне мелі асобны дзень, які б сьвяткавалі. Другую прычыну я паведаміў таму, што Бог загадаў народу ізраэльскаму сьвяткаваць суботу, каб яна ім нагадвала ды на памяць прыводзіла, што ім патрэбныя асьвячэньне ды адпачынак, або што яны патрабуюць, каб Бог іх асьвяціў ды ў Свой адпачынак прыняў. Паводле гэтай прычыны вольныя мы ад усіх сьвятаў ды субот, бо ўсім знакам ды вобразам канец прынёс ды ўчыніў Хрыстос. А хто такім звычаем суботу або нядзелю сьвяткуе, нядобра робіць ды супраць Хрыста юдэйствуе. Такі бо звычай сьвяткаваньня Хрыстос скасаваў, і Апосталы гэты звычай пакінулі, як Паўла да Калосцаў піша: «Дык хай ніхто вас не асуджае за яду або пітво, або з прычыны дня сьвяточнага або маладзіка, ці суботы, каторыя ёсьць ценем будучага, цела ж – Хрыстовае» (Кал. 2: 16-17).

Паглядзі ўважліва: сьвяты, суботы, ежу ды падобнае Апостал называе ценем, значыць, вобразам, а Хрыста ён заве целам, даючы знаць, што гэтыя суботы азначалі рэчы мінаючыя ды былі датуль, пакуль ужо ня цень, а сама праўда прыйшла, якую ён целам заве. А таму не павінны Хрысьціяне тым звычаем аніякіх сьвятаў мець, але ўсе дні за сьвятыя мусяць лічыць, як Ісая прарочыў, калі казаў: «І будзе: кожнага месяца ў час маладзіку і кожнага тыдня ў суботу прыйдзе кожны чалавек, каб пакланіцца Мне, – кажа Госпад» (Іс. 66), але гэта пасьля ўваскрашэньня ў поўні збудзецца.

Разгледзеўшы гэтую прычыну, пабач і іншыя прычыны, дзеля якіх Бог пастанавіў сьвяты. Гэта значыць, дзеля таго, каб быў асобны дзень, у які б усе людзі зыходзіліся да слуханьня Слова Божага, а нявольнікі ды жывёла каб адпачывалі. Паводле гэтых прычынаў мусіць быць у Хрысьціянаў пэўны дзень, бо і Хрыстос Сваім вучням зьбірацца загадвае, і ў Апостала чытаем, як усе зьбіраліся дзеля слуханьня Слова Божага і дзеля ламаньня хлеба. Да нявольнікаў таксама Бог загадвае быць міласьцівымі ды іх літаваць. Таму патрэбна, каб у Хрысьціянаў быў такі дзень, які яны мелі яшчэ ад пачатку.