Ці патрэбны нам, калі Богу молімся, памочнік або заступнік перад Ім?

Пытаньне

Адказ

Вельмі патрэбны нам заступнік, бо мы самі грэшныя і зусім ня вартыя, каб Бог нас выслухаў. Але не патрэбныя нам тыя памочнікі, якіх ужо колькі стагодзьдзяў таму нашыя продкі сабе навыдумлялі, прызываючы сабе на дапамогу тых, што ўжо памерлі або былі замучаны за веру ў Хрыста. Малітвы такім звычаем Бог ня толькі не выслухоўваў, але і вельмі дзеля іх гневаўся. Адзінага бо толькі даў нам Бог Памочніка або Заступніка – Ісуса Хрыста, Сына Свайго, як Апостал да Цімахвея пісаў: «Бо адзін Бог, і адзін пасярэднік між Богам і людзьмі – чалавек Хрыстос Ісус, Які Самога Сябе выдаў дзеля адкупленьня ўсіх» (1 Цім. 2: 5).

Гэтаксама і Пётр казаў: «Той Хрыстос – камень, каторы вы, будаўнікі, адкінулі, а Ён вось стаўся галавою кута. І няма ні ў кім іншым збаўленьня, бо няма іншага імя пад небам, дадзенага людзям, у каторым бы мы маглі быць збаўленыя» (Дзеі 4:10-11). Гэта і Сам Госпад сьцьвярджаў у такія словы: «Я – дарога, і праўда, і жыцьцё. Ніхто не прыходзіць да Айца, як толькі празь Мяне» (Ян 14: 6). Зноў жа, у іншым мейсцы Ён сьведчыць: «Сапраўды, сапраўды кажу вам: пра што будзеце прасіць Айца ў імя Маё, дасьць вам. Дасюль нічога не прасілі ў імя Маё. Прасіце і атрымаеце» (Ян 16: 23).

Ёсьць і іншыя мейсцы, якія нам паказваюць толькі на Самога Хрыста, што ў імя Ягонае мы маем маліцца Богу.