Ці ўсім Хрыстос дабраславенства заслужыў?

Пытаньне

Адказ

Праўда ў тым, што Бог паслаў Свайго Сына да ўсіх людзей і за ўсіх людзей Яго аддаў, бо і Сам Збаўца казаў: «Так палюбіў Бог сьвет, што Сына Свайго Адзінароднага даў» (Ян 3:16). Калі чуеш, што Бог палюбіў сьвет і аддаў за яго Свайго Сына, разумееш, што ані за аднаго чалавека, ані за тысячы, але ўсіх людзей Хрыстос прынёс ахвяру перад Богам. Ян пра Яго гэтаксама казаў: «Вось Ягнё Божае, Той, хто бярэ на Сябе грахі сьвету» (Ян 1: 29). Тым жа звычаем Апостал гаварыў: «Гэта добра і міла Збаўцы нашаму Богу, Які хоча збавіць усіх людзей і давесьці іх да пазнаньня праўды» (1 Цім. 2: 3-4).

Таму, кажу, праўда, што Хрыстос заслужыў дабраславенства ўсім людзям. Але ня ўсе людзі прыйдуць да гэтага падрыхтаванага дабраславенства. Не дзеля віны Бога, але дзеля сваёй віны, бо гэтага дабраславенства яны не прыймаюць. Гэта значыць, ня вераць ды на ахвяру Хрыста не спадзяюцца, дзеля чаго Ягоныя заслугі не прыносяць ім аніякага здабытку. Хоча бо Хрыстос, каб той, хто жадае збавіцца, у Яго верыў. Дзеля таго там, дзе сказаў: «Так палюбіў Бог сьвет, што Сына Свайго даў», Ён далучыў тыя словы: «Каб кожны, хто ў Яго верыць, не памёр, але меў жыцьцё вечнае».

Бачыш, чалавеку, які хоча мець жыцьцё вечнае, патрэбна вера, таму і Хрыстос загадаў Апосталам: «Ідзіце на ўвесь сьвет і вясьціце Эвангельле ўсякаму стварэньню. Хто ўверыць ды прыйме хрост, будзе збаўлены» (Мк. 16: 15-16).